Միացեալ Նահանգներու փոխնախագահ Ճէյ Տի Վենսի Հայաստան այցելութեան օրը՝ 9 Փետրուարին, մինչ ան հանդիպում կ՛ունենար Հայաստանի վարչապետ Նիկոլ Փաշինեանի հետ, Պաքուի մէջ պահուող հայ գերիներու ազատ արձակման համար նախագահական նստավայրին մօտ կազմակերպուեցաւ ցոյց, որուն մասնակիցները Վենսէն պահանջեցին, որ Հայաստանէն ետք Ատրպէյճան տուած այցելութեան ընթացքին նախագահ Իլհամ Ալիեւէն պահանջէ պատանդներուն ազատ արձակումը։ Անոնք նաեւ պահանջեցին երաշխաւորել պատմական հայրենիքը վերադառնալու արցախահայութեան իրաւունքը եւ Հայաստանի մէջ քաղաքական բանտարկեալներուն ազատ արձակումը։
Արցախի նախկին պետական նախարար Արտակ Բեգլարեան իր արտասանած խօսքին մէջ ըսաւ, որ աւելի լաւ պիտի ըլլար Վենս իր այցելութիւնը սկսէր Պաքուէն եւ իրեն հետ բերէր մեր բոլոր հայրենակիցները։ «Սակայն հիմա էլ նա հնարաւորութիւն ունի մէկ լաւութիւն անել հայ ժողովրդին եւ կատարել իր նախագահ Դոնալդ Թրամփի խոստումը` ոչ միայն վերադարձնելու հայ գերիներին, այլ նաեւ հետամուտ լինելու հայ ժողովրդի դէմ հալածանքների գոնէ մի մասի վերացմանը․ եւ բոլորս գիտենք, որ հայ գերիները այնտեղ պատանդներ են, բռնապետ Ալիեւի ձեռքին», յայտարարեց ան։
Բեգլարեան դիտել տուաւ. «Պատանդ նշանակում է, որ նրանք օգտագործւում կամ կ՛օգտագործուէն քաղաքական առեւտրի նպատակով, ուստի Ամերիկայի ղեկավարութիւնը հնարաւորութիւն ունի, որպէս տարածաշրջանում խաղաղութեամբ եւ Հայաստանի ու Ադրբեջանի միջեւ դիւանագիտական յարաբերութիւնների վերականգնմամբ շահագրգռուած կողմ, մէկ յստակ քայլ կատարելու, որը կը մօտեցնի իրական խաղաղութիւնը: Ի հարկէ, դրանով մեր ժողովուրդները չեն հաշտուի: Դրանով Արցախի ժողովրդի դէմ կատարուած ցեղասպանութեան հետեւանքները ամբողջապէս չեն վերացուի: Սակայն սա յստակ հումանիտար (մարդասիրական) շատ մեծ դրական քայլ կը լինի դէպի առաջ եւ նոր հնարաւորութեան դռներ կը բացի հետագայ հիմնախնդիրների հասցէագրման եւ երկարաժամկէտ խաղաղութիւն ապահովելու համար»:
Բեգլարեան յորդորեց Վենսին՝ Պաքու մէջ բարձրացնել 19 հայ պատանդներուն անյապաղ ազատ արձակման, անհետ կորսուածներու ճակատագիրներու պարզաբանման եւ Արցախի ժողովուրդի վերադարձին համար անհրաժեշտ քայլեր որդեգրելու հարցերը:
Նշենք, որ անցեալ շաբաթ Ամերիկայի Հայ Դատի յանձնախումբը համացանցային արշաւի մը նախաձեռնեց՝ պահանջելու Վենսէն, որ ապահովէ հայ գերիներուն ազատ արձակումը, եւ աջակցի պատմական հայրենիքը վերադառնալու արցախահայութեան իրաւունքին։