Ամառնային եղանակին զերծ մնալու համար սննդային թունաւորումներէ եւ չվնասելու համար մեր մանուկներուն ու զաւակներուն առողջութիւնը, անհրաժեշտ է գործադրել սննդանիւթերու պահպանման որոշ կանոններ.

Հիմնական Կանոններ՝ Պտոյտներու եւ Ճամբորդութեան Ընթացքին

Եթէ որոշած էք ձեզի հետ ուտեստեղէն վերցնել ու ճամբայ ելլել, առաւելաբար ուշադրութիւն դարձուցէ՛ք հետեւեալ կէտերուն.

1. Խնամեալ Ընտրութիւն.  Վաճառատուներէն ու խանութներէն ընտրեցէ՛ք միայն թարմ, պիտանելիութեան պայմանաժամկէտի մէջ գտնուող սննդամթերք։

2. Պատշաճ Պահպանում.  Իւրաքանչիւր ուտեստեղէնի տեսակ պահեցէ՛ք ամուր կերպով գոցուած ամաններու կամ տուփերու մէջ։

3. Յստակ Բաժանում.  Իրարմէ զատեցէ՛ք հում սննդամթերքը եփած ու պատրաստ կերակուրներէն՝ տարբեր պնակներու մէջ դնելով զանոնք։

4. Պահպանման Պայմաններ.  Կենդանական ծագում ունեցող սննդամթերքը (ինչպէս՝ միս, ձուկ, հաւկիթ, մայոնէզ, կաթնեղէն եւ այլն) անպատճառ պահեցէ՛ք ջերմաստիճանի ճիշդ պայմաններու մէջ։ Ճամբորդութեան ընթացքին շուտ փճացող մթերքը (կաթնեղէն, մսեղէն, սերուցքային ու քրեմային մածուկներ) վերցուցէ՛ք միայն սառնարան-պայուսակներով՝ զանոնք զով պայմաններու մէջ պահպանելով։

5. Թանձրուկներ.  Ամռան տաք օրերուն ընդհանրապէս հրաժարեցէ՛ք թանձրուկով (քսուկ, քրէմ) պատրաստուած քաղցրեղէնէ։

6. Աղցաններէ Զգուշութիւն.  Խուսափեցէ՛ք երկար ատեն սեղանին վրայ, բարձր ջերմաստիճանի եւ արեւու տակ մնացած աղցաններն ու նախուտեստները ճաշակելէ։

Բնաւ մի՛ գնէք ուտեստեղէն փողոցներէ կամ բացօթեայ անպատշաճ վայրերէ։ Այդպիսի պարագաներու, մթերքը ի սկզբանէ ենթակայ կ’ըլլայ օդի փոշիին, մանրէներուն եւ երբեմն սաստիկ տաքութեան, հետեւաբար կրնայ վտանգի ենթարկել ձեր առողջութիւնը։

Տաքութեան Պայմաններ

Սննդամթերքի ապականումը կանխելու համար անհրաժեշտ է պահպանել սառնարանի ճշգրիտ ջերմաստիճանը.

o Կաթնեղէն, Մսեղէն եւ Սերուցքային Արտադրանք.  Ասոնց պահպանման համար անհրաժեշտ է -2 C-էն մինչեւ +4 C ջերմաստիճան։

o Հաւկիթ.  Պէտք է պահել 0 C-էն մինչեւ +20 C ջերմաստիճանի տակ (պիտանելիութեան առաւելագոյն պայմանաժամկէտը 25 օր է)։

o Ձկնեղէն.  Ձուկը նոյնպէս շուտ փճացող մթերք կը սեպուի։ Անհրաժեշտ է զայն պահել եւ վաճառել միայն սառնարանային պայմաններու մէջ։ Պաղեցուած ձկնեղէնը պէտք է պահուի -2 C-էն մինչեւ 0 C ջերմաստիճանի տակ՝ առաւելագոյնը 48 ժամ։

o Տապկել եւ Եփել.  Հում մթերքը լաւապէս եփեցէ՛ք կամ տապկեցէ՛ք՝ 70 C-էն ոչ պակաս ջերմաստիճանի տակ, որպէսզի բոլոր մանրէները չէզոքանան։

Արտաքին Միջավայրի Ազդակներ եւ Մաքրութիւն

Թելադրելի է չգնել այնպիսի սննդանիւթեր, որոնք կը գտնուին արտաքին միջավայրի վատառողջ ազդակներու անմիջական ազդեցութեան տակ՝ արեւու, անձրեւի, փոշիի, ինքնաշարժներու արտանետած ծուխերու եւ այլն։

Այս զգուշութիւնը կը վերաբերի պատրաստման եւ պահպանման յատուկ պայմաններ պահանջող հետեւեալ ուտեստեղէնի տեսակներուն՝ մսեղէն, կաթ ու կաթնամթերք, սերուցքային նիւթեր, փափուկ  պաղպաղակ, ձուկ ու ձկնեղէն, կարկանդակներ, ինչպէս նաեւ կտրուած ձմերուկ եւ այլ պտուղներ։

Սնունդը վարակներէ զերծ պահելու համար (այսինքն՝ ձեռքերուն վրայ գտնուող մանրէներն ու ժահրերը մթերքին փոխանցելէ զգուշանալու համար), անհրաժեշտ է ձեռքերը տեւաբար լուալ։ Օճառով լաւապէս լուացէ՛ք ձեր ձեռքերը երբ կերակուր կը պատրաստէք կամ սեղան կը նստիք։ Պտուղները, բանջարեղէնն ու հատապտուղները օգտագործելէ առաջ նոյնպէս լաւապէս լուացէ՛ք զանոնք խմելու հոսող ջուրով։