Կիւմրիի «Շիրակ» խումբի գլխաւոր մարզիչի պարտականութիւնները կրկին վստահուեցան  Վարդան Պչաքճեանին, որուն մասին պաշտօնապէս յայտարարեց ակումբի մամլոյ կայքէջը:  Պչաքճեանի մարզիչական կազմին մէջ են նաեւ  Ֆելիքս Խոջոյեան, Տիգրան Դաւթեան, Արտակ Ադամեան եւ դարպասապահներու մարզիչ Արթուր Յովհաննէսեան։ Այս երկրորդ անգամն է որ Պչաքճեան կը գլխաւորէ «Շիրակ»-ը: 2020 թուականի ամռան, Երեւանի «Արարատ»-ը գլխաւորելէ առաջ, Պչաքճեան իրեն հարազատ «Շիրակ»-ի ղեկին եղած  է 11 տարի՝ 344 խաղի համար մարզելով խումբը, խումբին հետ դառնալով Հայաստանի ախոյեան, նաեւ կրկնակի գաւաթակիր ու մէկ անգամ ալ սուփըր գաւաթակիր: Վարդան Պչաքճեանի  գլխաւորութեամբ «Արարատ»-ը 13 տարի ետք  դարձաւ Հայաստանի գաւաթակիր: 2022-ի  Յունուարին ան  լքեց  «Արարատ»-ը, որմէ ետք մինչեւ 2023 մարզեց  Երեւանի «Արարատ-Արմինիըն»-ը:

Կիրակի օր Իտալիոյ Ինթըր Միլանը յաջողեցաւ 21-րդ անգամ ըլլալով տիրանալ երկրի ախոյեանութեան, Ա. մրցաշարքի առաջնութեան 35-րդ փուլին 2 – 0 արդիւնքով պարտութեան մատնելով Պարման:  Ռոմանացի Քրիստիան Քիվուի գլխաւորած խումբը առաջին խաղակիսուն, աւելցուած առաջին վայրկեանին ֆրանսացի յարձակող Մարքոս Թիւրհամ նշանակեց Միլանի առաջին կոլը: Հայաստանի հաւաքականի նախկին աւագ կիսապաշտպան Հենրիկ Մխիթարեան մուտք գործեց դաշտ հանդիպումի 68-րդ վայրկեանին, որմէ տասը վայրկեան ետք կրկնապատկեց Միլանի արդիւնքը: Ինթըր մինչեւ օրս ապահոված է 82 կէտ, եւ առաջնութիւնը աւարտելէ երեք փուլ առաջ, 12 կէտի տարբերութեամբ գերազանցած է երկրորդ դիրքը գրաւող Նափոլին:  Ինթըրի կազմով Հենրիկ Մխիթարեան երկրորդ անգամն է որ կը տիրանայ Իտալիոյ ախոյեանութեան:

Համաշխարհային Ֆութպոլի միջազգային դաշնութեան նախագահ  Ճաննի Ինֆանթինո հաստատեց, որ Իրանի հաւաքականը կը մասնակցի Յունիս-Յուլիսին Ամերիկայի Միացեալ Նահանգներու, Քանատայի եւ Մեքսիքոյի մէջ տեղի ունենալիք աշխարհի առաջնութեան: «Իրան ներկայ պիտի ըլլայ  աշխարհի առաջնութեան։ Անշուշտ առաջին փուլի մրցումները պիտի կատարէ ԱՄՆ-ի մէջ ։ Պատճառը  պարզ է. մարզանքը ոչ մէկ ձեւով կախեալ է քաղաքական հարցերէ»: Ինֆանթինոյի խօսքը մէջբերեց AS-ը։ Աւելցնենք, որ Իրան խմբային փուլի հանդիպումները պիտի կատարէ Լոս Անճելոսի մէջ: