ՀՀ-ի իշխանութեան ծրագրած եւ գործադրութեան դրուած Հայաստանեան Առաքելական Եկեղեցւոյ դէմ արշաւը, ազգային բարերարներու նկատմամբ հաշուեյարդարի քաղաքականութիւնը, ՀՅԴ-ի եւ ընդդիմադիրներու հանդէպ հալածանքը եւ Սփիւռքի դերը նսեմացնելու արշաւը ամէն չափ ու սահման անցած են:
Հայաստանեայց Առաքելական եկեղեցին հայրենի եւ աշխարհասփիւռ ազգի հիմնասիւներէն է եւ կրօնական հանգամանքէ անդին՝ հայկական էութեան անաղարտ պահպանման էական խարիսխներէն։ Ամենայն Հայոց կաթողիկոսի անձի եւ հոգեւորական դասու թիրախաւորումը ոչ միայն անընդունելի է, այլեւ ազգակործան դիտաւորութիւն: Արշաւ եկեղեցւոյ դէմ՝ կը նշանակէ նաեւ հարուած հասցնել հայութեան միասնականութեան եւ խարխլել մեր պետութեան հիմերը։ Խիստ մտահոգիչ է, որ այս արշաւը կ’իրականացուի Ատրպէյճանի պետական եւ կրօնական ղեկավարներու կողմէ Հայաստանեայց Առաքելական եկեղեցւոյ թիրախաւորումին զուգահեռ՝ նոյնանման բառապաշարով եւ ուղերձներով, այն պարագային երբ մեր եկեղեցին եւ Ամենայն Հայոց կաթողիկոսն անձամբ աշխոյժ աշխատանք կ’իրականացնեն հայ գերիներու ազատ արձակման, արցախահայութեան հաւաքական իրաւունքներու սատարման ու անոր վերադարձի իրաւունքի միջազգայնացման համար։
Եկեղեցւոյ դէմ արշաւն ընդարձակելով թիրախ են ընտրուած անոր կողքին ամուր կանգնած ականաւոր հայեր ու ազգային բարերարներ եւս, որոնք յստակօրէն կը տեսնեն ՀՀ-ի վարչախումբի հալածանքի քաղաքականութեան վտանգները: Այս ուղղութեանբ ցայտուն օրինակ է վերջերս ձերբակալուած Սամուէլ Կարապետեանի կամայական եւ անօրինական կալանաւորումը, որ յստակօրէն քաղաքական հաշուեյարդարի դրսեւորում է։ Պրն. Կարապետեան հայ եկեղեցւոյ եւ հայ դատի հաւատաւոր պաշտպաններէն է, որ խօսքէ անդին իր գործով ու ներդրումներով օժանդակած է հայ ժողովուրդին ու Հայ Դատի պայքարին: Ակնյայտ է, որ սա փորձ է վախի սփռումով լռեցնելու հասարակութիւնը եւ ազդեցիկ անհատները, որպէսզի ազգային հարցերով դիրքորոշում չարտայայտեն։
Բազմիցս անդրադարձած ենք քաղաքական այլախոհութեան նկատմամբ հալածանքին եւ Հայաստանի մէջ ժողովրդավարութեան նահանջին եւ խօսքի ազատութեան բռնաբարումներուն մասին: Ազգային ուժերու թիրախաւորումը, ընդհանրապէս ընդդիմադիրներու, եւ մանաւանդ ՀՅԴ-ի գործիչներու նկատմամբ խուզարկութիւններու եւ ձերբակալութիւններու նոր ալիքը ընդդիմութիւնը լռեցնելու եւ հանրութեան մօտ վախի մթնոլորտ տարածելու հերթական փորձ է, որ յատուկ է բռնապետական վարչակարգերուն:
Այս ամէնուն կողքին թիրախ է ընտրուած նաեւ հայ Սփիւռքը, մանաւանդ անոր կազմակերպուած կառոյցները: Ազգային տեսլականէ դատարկուած ՀՀ-ի իշխող վարչախումբը կը փորձէ ջրել Սփիւռքէն եկող լուրջ մտահոգութիւնները ապատեղեկատուութեամբ եւ արհամարհանքով: Հայաստանի ճակատագիրը միայն Հայաստանի քաղաքացիներու գործը չէ՝ այն համայն հայութեան մտասեւեռումն է։ Մեղսակից լռութիւնն այսօր կարող է յանգեցնել մեր ազգային արժէքներու վաղուան կորուստին եւ բռնատիրական պետական քաղաքականութեան ամրապնդման: Ոչ մէկ հայրենասէր սփիւռքահայ կրնայ մերժել իր պատասխանատուութիւնը՝ լուռ հետուելով, թէ ինչպէս պետական լծակները կ’ուղղուին մեր հոգեւոր, բարեգործական եւ ընդդիմադիր տարրերու դէմ:
Իշխանական այս ներհայրենի եւ ներազգային քանդիչ քաղաքականութիւնը հարուած է նաեւ Հայաստանի պետականութեան: Անընդունելի է, որ այս ճգնաժամային ժամանակահատուածին երբ Թուրքիա եւ Ատրպէյճան խնդրոյ առարկայ կը դարձնեն հայրենիքի լինելիութիւնն անգամ, Հայաստանի իշխող խմբակը յատուկ ճիգով շարունակէ առաջ տանիլ հայութիւնը պառակտելու, վախի ու սարսափի մթնոլորտի տարածումով ամէն տարակարծութիւն լռեցնելու եւ բռնատիրական միջոցներով ժողովրդավարութիւնը եւ մարդկային տարրական իրաւունքները ոտնահարելու քաղաքականութիւնը։
Ժամանակն է, որ այս գռեհիկ ու ազգակործան կազմակերպուած գրոհը արժանանայ համահայկական աներկբայ խիստ դատապարտումի:
Յակոբ Տէր Խաչատուրեան
ՀՅԴ Բիւրոյի նախկին ներկայացուցիչ, ՀՅԴ Հայ Դատի Կեդրոնական Խորհուրդի Նախագահ