ՀՀ ԱԳՆ յայտարարութիւն տարածած է Արցախի Հանրապետութեան հռչակման 31-ամեակին առիթով:
Յայտարարութիւնը կը ներկայացնենք ստորեւ.
“2 Սեպտեմբեր 1991-ին Լեռնային Ղարաբաղի Ինքնավար Մարզի եւ Շահումեանի շրջանի բոլոր մակարդակների պատգամաւորների համատեղ նստաշրջանն ընդունեց Լեռնային Ղարաբաղի անկախութեան հռչակագիրը։
Այս քայլն Ատրպէյճանի ԽՍՀ կողմից հայերի դէմ էթնիկ զտումների քաղաքականութեան տրամաբանական հետեւանքն էր, ինչի դրսեւորումները առկայ են նաեւ այսօր։
Հակառակ Ատրպէյճանի իշխանութիւնների կողմից մշտապէս հնչող այն յայտարարութիւններին, թէ Լեռնային Ղարաբաղի հիմնախնդիր եւ Լեռնային Ղարաբաղ տարածքային միաւոր այլեւս գոյութիւն չունի՝ փաստ է, որ Լեռնային Ղարաբաղում շարունակում են բնակուել շուրջ հարիւր քսան հազար հայեր, որոնք, որպէս միջազգային հանրութեան անդամ, ունեն հաւասար եւ անօտարելի իրաւունքներ, եւ հակամարտութիւնը չի կարելի լուծուած համարել, քանի դեռ չեն հասցէագրուել արցախահայութեան խորքային կարիքները։
Լեռնային Ղարաբաղի հայ բնակչութեան անվտանգութեան եւ իրաւունքների երաշխաւորումը եւ Լեռնային Ղարաբաղի հակամարտութեան համապարփակ եւ երկարաժամկէտ լուծումը՝ օգտագործելով ԵԱՀԿ Մինսքի խումբի համանախագահութեան փորձը եւ ներուժը, շարունակում են առանցքային լինել Հարաւային Կովկասում կայունութեան եւ խաղաղութեան հասնելու ճանապարհին։
Հայաստանի Հանրապետութիւնը շարունակում է յանձառու լինել Արցախի բնակչութեան կենսագործունէութեան համար անհրաժեշտ բոլոր պայմանների ապահովման եւ իրենց բնօրրանում անվտանգ ապրելու համար”։