20 Յուլիսին, ՆՍՕՏՏ Գարեգին Երկրորդ Ծայրագոյն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնի մէջ ընդունեց Հայ Յեղափոխական Դաշնակցութեան երիտասարդական և ուսանողական 12-րդ Համահայկական բանակումի մասնակիցները՝ ուղեկցութեամբ ՀՅԴ Բիւրոյի անդամ Յովսէփ Տէր-Գէորգեանի և ՀՅԴ Հայաստանի Գերագոյն Մարմինի անդամ Գեղամ Մանուկեանի։
Հանդիպման ինթացքին Յովսէփ Տեր-Գէորգեան, հայցելով Ամենայն Հայոց Հայրապետի օրհնութիւնը, ընդգծեց, որ այս տարուան ՀՅԴ Համահայկական բանակումը կ՚իրականանայ «Պիտի վերադառնանք» կարգախօսով, ինչ որ կարևոր ուղերձ է՝ վերադառնալու մեր արմատներուն ու մեր հոգևոր-ազգային արժեքներուն։
Այնուհետև Նորին Սրբութիւնը իր հայրական օրհնութիւնը տուաւ ներկաներուն, գնահատելով ՀՅԴ երիտասարդական և ուսանողական միութիւններու պատասխանատուները տարբեր երկիրներէ հայորդիներ հայրենիքի մէջ պարբերաբար համախմբելու համար, ինչ որ լաւագոյն առիթն է զօրացնելու անոնց ազգային-հոգևոր նկարագիրը և նուիրումը առ հայրենին։
Վեհափառ Հայրապետը, խօսելով ազգային ինքնութիւնը անխաթար պահելու և հոգևոր արժէքներով առաջնորդուելու հրամայականին մասին, ընդգծեց, որ հայրենիքի նկատմամբ անսակարկ սիրով ու ազգային նկարագրով երիտասարդն է հայրենիքի ամրութիւնը և ազգի յարատեւութիւնը։
Անդրադառնալով Արցախի բռնագրաւման, հայրենազրկուած արցախահայութեան իրաւունքներու պաշտպանութեան և Ատրպէյճանի մինչեւ օրս պահուող հայ գերիներու վերադարձին, Արցախի հայկական հոգևոր-մշակութային ժառանգութեան պահպանութեան հարցերուն ու երկրէն ներս տիրող դժուար կացութեան՝ Հայոց Հայրապետը կարևոր համարեց ազգային միաբանութիւնը՝ ի սէր հայրենիքի և յանուն համազգային շահերու ու առկայ մարտահրաւէրներու յաղթահարման։
Աւարտին, Նորին Սրբութիւնը մաղթեց, որ ազգասիրութեան զօրեղ ոգին ու կամքը մշտապէս ուղեկից ըլլան հայ երիտասարդներուն՝ համընդհանուր ճիգերով զօրացեալ կերտելու հայրենիքի անվտանգութիւնը, մեր ժողովուրդի խաղաղ ու բարօր կեանքը։