Ֆրանսայի Ֆութպոլի Ազգային Հաւաքականի նախկին խաղացող, Ռէալ Մատրիտի նախկին ֆութպոլիստ եւ գլխաւոր մարզիչ Զենատտին Զիտան Ֆրանսայի Ֆութպոլի Դաշնութեան հետ չորս տարուան պայմանագրութիւն մը ստորագրեց՝ ստանձնելու Ֆրանսայի հաւաքականի գլխաւոր մարզիչի պաշտօնը: Զիտանի առաջին պաշտօնական մասնակցութիւնը պիտի ըլլայ 2027-ի Եւրոպայի Ազգային Լիկի մրցաշարքին, որմէ ետք հաւաքականը պիտի մասնակցի 2028-ի Եւրոպայի առաջնութեան եւ 2030-ի աշխարհի ախոյեանութեան։

Յիշեցնենք, որ Ֆրանսայի Ազգային Հաւաքականի նախկին գլխաւոր մարզիչ Տիտէ Տիշամպ աշխարհի 2026-ի ախոյեանութեան աւարտին հեռացաւ իր պաշտօնէն։ Ֆրանսայի հաւաքականը աշխարհի 2026-ի ախոյեանութեան հասաւ մինչեւ կիսեզրափակիչ, ուր 2-0 արդիւնքով զիջեցաւ Սպանիոյ հաւաքականին, որ իր կարգին եզրափակիչին յաղթեց Արժանթինին եւ աշխարհի ախոյեան դարձաւ, իսկ Ֆրանսա երրորդ դիրքին համար պարտուեցաւ Անգլիոյ խումբէն՝ 6 – 4 արդիւնքով:

 Գերմանիոյ Ֆութպոլային Միութիւնը Ֆրանքֆորթի մէջ տեղի ունեցած յատուկ մամլոյ ասուլիսի ընթացքին պաշտօնապէս յայտարարեց ազգային հաւաքականի նոր գլխաւոր մարզիչին անունը։ Պաշտօնը ստանձնեց Եորկըն Քլոփ, փոխարինելով Նակելսմանը: Գերմանիոյ Ֆութպոլային Միութեան նախագահ Պերնտ Նոյենտորֆ յայտնեց, որ 59-ամեայ մասնագէտին հետ պայմանագրութիւնը գործուն պիտի ըլլայ 15 Օգոստոսէն մինչեւ 2030-ի աշխարհի ախոյեանութեան մրցաշարքի աւարտը։

«Մենք զինք կը տեսնենք որպէս մասնագէտ եւ այս աշխատանքին նկատմամբ մեծ հետաքրքրութիւն ունեցող անձնաւորութիւն։ Ան հիանալի մարզիչ է եւ լաւ համբաւ ունի խաղացողներուն մօտ», ըսաւ Նոյենտորֆ Քլոփի շնորհանդէսին ընթացքին։ Յիշեցնենք, որ Եորկըն Քլոփ վերջին անգամ մարզած էր անգլիական Լիվըրփուլը, որուն հետ մնացած էր 2015-էն 2024:

Կիրակի օր Սպանիոյ մայրաքաղաքի Ռէալ Մատրիտի կայքը պաշտօնապէս յայտարարեց, որ ակումբի պատասխանատուները վերջնական համաձայնութեան հասած են Գերմանիոյ Լայպզիք խումբի իվորիացի խաղացող Եան Տիոմոնտի հետ, փոխան 120 միլիոն եւրոյի: Ըստ փոխանցուած տեղեկութիւններուն, 19-ամեայ խաղացողով հետաքրքրուած էր նաեւ Ֆրանսայի Փարիզ Սան Ժերմանը, Լիվըրփուլն ու Մանչեսթըր Սիթին: Աւելցնենք, որ Տիոմոնտի այս տարուան հինգերորդ խաղացողն է, որ կը միանայ Սպանիոյ արքայական ակումբին: Ան վերջերս կազմին միացուց Գոգորէան, Իպրահիմա Քնաթէն, Պերնարտո Սիլվան եւ Տենզըլ Տամֆրիզ:

Ըստ ակումբի տեղեկութիւններուն, Մատրիտ մտադիր է նաեւ խումբին միացնել սպանացի Ռոտրին: