Հայաստանի Լոռիի և Տաւուշի ջրհեղեղներուն հետևանքով կայ 4 զոհ։ «Արմէնփրէս»-ի հաղորդմամբ՝ լրագրողներու հետ զրոյցի ընթացքին այս մասին յայտնած է Հայաստանի տարածքային կառավարման և ենթակառոյցներու նախարար Գնել Սանոսեան։
«Քիչ առաջ նաև յայտնաբերուած է անհետ կորած անձերէն մէկուն դին։ Կրնանք ըսել, որ ունինք չորս զոհ այս աղէտին հետևանքով», ըսած է Սանոսեան։
26 Մայիսին յորդառատ անձրևներու և Դեբեդ, Աղստև, Տաշիր գետերու վարարումին հետևանքով Լոռիի և Տաւուշի մարզերուն մէջ ջրհեղեղներ յառաջացած են։ Ջրհեղեղներուն հետևանքով ջուրով լեցուած են տուներ, շէնք-շինութիւններ, քանդուած են ճանապարհներ։